المطبلاتى/بقلم ربيع الغريب

قصيده عاميه بعنوان
(((  المطبلاتى  )))

إنزل يا عم بطبلتك
متعنا يللا  بطقرتك
على طقره  ونص
كمان طبل ....
علشان يشوفوا محبتك
هلل ونافق كدا وإكدب
مدام فى صالح حضرتك
جايز تنول كرسى ومنصب
والناس عليهم تحسدك
خليك على جناح الهوى
وإمدح فى الباطل يسعدك
وإنزل يا عم بطبلتك
متعنا يللا  بطقرتك
......  إنزل  ......

طبل وزيد فى الطبل كمان
طبل يا عم فى كل مكان
بكره هايجى عليك الدور
وهتبقى عبره للأجيال
لا كرسى ولا منصب بيدوم
دنيا غروره ملهاش أمان
خليك عايش كدا في الدور
فى نفاق وكدب وف أوهام
وإعمل ما بدالك حتى تنول
وإمشى يا عم مع التيار
وطبل وزيد فى الطبل كمان

إمدح  ولى نعمتك
ويا هناك  يا فرحتك
لو تطلب لبن العصفوره
هيجبهولك  وهيسعدك
طبل وخليك فى الصوره
مدام فى صالح حضرتك
وإنزل يا عم بطبلتك
متعنا يللا  بطقرتك
......  إنزل  ......

رخص كمان وكمان نفسك
وبيع كرامتك  ومبادئك
عمال تغنى وتترقص
ودا كله علشان مصلحتك
الحق شايفه كدا  ولكن
مش جاى على هوى سيادتك
خليك فى الوحل والباطل
وإكدب ونافق كدا براحتك
وإن كان لك حاجه
عند سيادته  ..
قوله يا عمى  ويا بختك
ورخص كمان وكمان نفسك
وبيع كرامتك  ومبادئك

وإمدح  ولى نعمتك
وإشترى الدنيا بأخرتك
إمدح فى الباطل يسعدك
ويا هناك  يا فرحتك
إعمل لو حتي بلياتشو
مدام فى صالح حضرتك
وإنزل يا عم بطبلتك
متعنا يللا  بطقرتك
......  إنزل  ......
؛---------------------

كلمات / ربيع الغريب
؛----------------------